Samtalið við ungbarnið mitt

Leiðir til að tengjast ungbarninu þínu

Það skiptir máli að finna leiðir til að tengjast ungbarninu þínu í daglegum samskiptum, þar sem það hjálpar barninu að finna fyrir umhyggju og öryggi – sérstaklega þegar foreldri upplifir vanlíðan.

Hér eru nokkur atriði sem geta stutt við örugga tengslamyndun:

• Brosa til barnsins þegar þú horfir á það.
  ‍Þegar þú brosir til barnsins gefur þú því skýr skilaboð um hlýju, ást og nærveru.
• Halda augnsambandi við barnið þar til það lítur undan.
  Að mynda augnsamband við barnið þitt styrkir tengslin og eykur öryggiskennd þess. Þegar barnið lítur undan er það að gefa merki um að það þurfi hlé frá samskiptum eða að það sé tilbúið að kanna eitthvað nýtt. Ungbörn sýna ýmis merki um að þau þarfnist hlés, til dæmis með því að sjúga á sér höndina, geispa, blikka augunum hratt eða snúa sér undan. Slík merki gefa til kynna að óþroskað taugakerfi þeirra þurfi tíma til að vinna úr örvun og halda jafnvægi.‍
• Halda barninu þétt að þér og faðma það.
  Líkamleg nánd getur dregið úr streitu, bæði hjá barninu þínu og þér.‍
• Rugga barninu varlega og tala við það með róandi röddu þegar það er órólegt.
  Rólegur raddblær og sönglandi rödd getur haft róandi áhrif á barnið og hjálpað því að upplifa sig öruggt.‍
• Brosa og kinka kolli þegar barnið gefur frá sér hljóð.
  Þegar foreldri bregst við hljóðum og látbragði barnsins, með brosi, kinki eða með því að endurtaka þau hljóð sem barnið gefur frá sér, styrkir það fyrstu samskiptin og gefur barninu tilfinningu fyrir því að það sé tekið eftir því og hlustað á það.‍
• Endurtaka það sem barnið segir.
  Með því að spegla eða endurtaka hjal barnsins, eftir að það hefur lokið við „setningu“, verða til fyrstu frumstæðu „samtölin“ ykkar á milli til. Þessi einföldu samskipti styrkja tengslin á milli ykkar og leggja grunn að framtíðar samskiptum barnsins.

‍

Hvernig er hægt að halda ró þegar barnið grætur?

Það er eðlilegur hluti af þroska barns að gráta. Stundum er erfitt að átta sig á hvað veldur vanlíðan eða hvað barnið er að reyna að tjá. Það sem skiptir mestu máli er að muna að þegar barnið er órólegt leitar það eftir viðbrögðum og nærveru frá sínum nánustu.

Fyrir marga foreldra getur verið krefjandi að heyra barn gráta, sérstaklega þegar þeir upplifa sjálfir streitu, vanlíðan eða glíma við veikindi. Slíkar aðstæður geta gert það erfiðara að halda ró og bregðast við af yfirvegun. Ef þú upplifir að það sé erfitt að róa barnið í slíkum aðstæðum getur hjálpað að:

• anda hægt og djúpt í nokkrar mínútur
• hlusta á róandi tónlist
• setja barnið á öruggan stað, til dæmis í rúmið sitt eða vögguna, og taka þér örstutt hlé til að ná áttum

Ef þú ert mjög þreytt(ur), veik(ur/t) eða finnur að vanlíðan fer vaxandi getur verið gagnlegt að biðja vin, maka eða fjölskyldumeðlim um að taka við og hugga barnið á meðan þú hvílir þig, leggur þig eða ferð í stutta gönguferð.

Það er eðlilegt að skilja ekki alltaf hvers barnið þarfnast, sérstaklega þegar maður upplifir sjálfur vanlíðan. Í slíkum tilvikum getur verið gott að treysta á stuðning fjölskyldu og vina eða leita til fagfólks sem getur stutt við þig og barnið.

‍Mundu - Það er styrkur fólginn í því að þekkja eigin mörk og taka sér hvíld þegar þörf er á.