Um okkur

Sigríður sat í stjórn Geðhjálpar frá 2019 til lok árs 2020, en þá tók hún við sem verkefnastjóri í innleiðingu stuðnings og fræðslu fyrir börn foreldra með geðrænan vanda. Okkar heimur er verkefni sem hún hóf innan Geðhjálpar. Sigríður ólst sjálf upp hjá foreldri með geðrænan vanda og upplifði úrræðaleysi í málaflokknum. Hún hefur einnig starfað hjá Konukoti, Velferðarsviði Reykjavíkurborgar og sat í stjórn Sáttar – samtaka um átröskun og tengdar raskanir.

Hún hefur haldið ýmis erindi og vakið athygli á stöðu barna sem aðstandenda foreldra með geðrænan vanda og situr í vinnuhópi hjá Landspítalanum um bættan stuðning við aðstandendur. Sigríður situr einnig í stjórn Geðverndarfélags Íslands.

Þórunn Edda útskrifaðist frá Háskóla Íslands með BA gráðu í félagsráðgjöf árið 2018 og MA gráðu til starfsréttinda árið 2020. Í meistaraverkefni sínu rannsakaði hún reynslu og upplifun barna á Íslandi af því að eiga og annast foreldra með geðsjúkdóma, með áherslu á þörf þeirra fyrir stuðning og úrræði.

Þórunn starfaði sem stuðningsfulltrúi á Geðgjörgæslu Landspítalans samhliða námi. Frá útskrift hefur hún unnið sem félagsráðgjafi á geðendurhæfingardeild Landspítalans og hjá Barnavernd Kópavogs. Hún hefur lagt mikla áherslu á að veita börnum og fjölskyldum faglegan stuðning og vinnur að úrbótum í þjónustu við börn í viðkvæmri stöðu, bæði innan stofnana og í nærumhverfi þeirra.

Kolbrún Fjóla útskrifaðist með BA-gráðu í félagsráðgjöf frá Háskóla Íslands árið 2023 og með MA-gráðu til starfsréttinda árið 2025. Hún á að baki sex ára starfsreynslu sem leikskólaleiðbeinandi áður en hún hóf nám í félagsráðgjöf. Kolbrún starfaði samhliða námi sem uppeldis- og meðferðarráðgjafi á vistheimilinu Mánabergi og einnig sem tilsjónaraðili á vegum Barnaverndar Kópavogs. Hún var ásamt því um tíma sjálfboðaliði hjá Konukoti.

Kolbrún hefur reynslu af því að vera stuðnings- og fósturforeldri sem veitti henni ákveðna innsýn í aðstæður fjölskyldna. Hún hefur mikla unun af því að starfa með börnum og fjölskyldum þeirra ásamt því að andleg heilsa er henni afar hugleikin.

Bergdís Júlía er leikkona, leikstjóri og leiklistarkennari með B.A. gráðu í leiklist frá Rose Bruford College og kennaramenntun frá Háskóla Íslands. Hún hefur starfað með fjölbreyttum leikhópum, rekur leikhópinn Spindrift og hefur sýnt á Íslandi, á Norðurlöndunum og í Bretlandi, bæði í hefðbundnum og tilraunakenndum verkefnum.

Síðustu ár hefur hún kennt börnum og fullorðnum leiklist víða, m.a. í grunnskólum, Borgarleikhúsinu og á námskeiðum víðsvegar um landið. Hún tók þátt í innleiðingu Trúðavaktarinnar á Barnaspítala Hringsins og starfar sem sjúkrahússtrúður. Bergdís leggur áherslu á barnamenningu, sjálfstyrkingu og vellíðan með leikgleði, öryggi og skapandi tjáningu að leiðarljósi.